المشير بيهيس ..عايز يبقى ريس!!

يعنى ايه كوكا زيرو .يعنى مهما اختلف توجهك وتفكيرك مشيرك هو مصيرك

جديم أوى يا بوى

بنتى الصغيرة – عفريتة – و فى منتهى خفة الدم و بمنتهى البساطة ممكن تعلق على أى شىء تعليقات تفطس من الضحك ..كل لما تلاقينى بعمل حاجة و متعجبهاش تقولى – دا إنتى جديم أوى يا بوى – طبعا جيل طلع فتح عينه على الفضائيات و الإنترنت و الموبايل و الفيسبوك بيعتبرنا جيل –جديم- ...فعلا محنا جيل كان بيتفرج على القناة الأولى و الثانية لحد لما التليفزيون الساعة 12 يعمل ووششششششش..و أسعد أوقات حياته لما كان يتفرج على سينما الأطفال مرة فى الإسبوع يوم الجمعة قبل الصلاة و النافذة الوحيدة التى كانت تفتح أمامه على العالم الخارجى إخترنالك يوم الأربعاء و أفلام القناة الثانية الأجنبى المعادة المكررة !!!..و مثل دخول التليفون المنزلى لأغلبنا حدث فارق فى الحياة – لما كنا بنقعد نضرب أى رقم عشوائى علشان نتكعبل فى بنت نعاكسها شوية !!! فعلا جديم أوى ...الأكادة بأه إن فيه ناس أكبر من الجيل الجديم ده بجيلين و فاكره نفسها بتفهم و بتسطنصح على شعب مش يفهمها و هيا طايرة ..لا يفهمها و هيا لسه فى العش !!...يا سيادة المشين ! ..مش حقولك إلا كلمة بنتى –إنتى قديم أوى يا بوى – و هبلة و سخيفة و مكشوفة الحركة العرة اللى إنتى عملتها دى ..و أل إيه لوحدة من غير حراسة !!!..و أحلف على الميه تجمد إن نص اللى فى الشارع كانوا قوات خاصة و مخابرات – طبعا فى لباس مدنى – ده غيرالقناصة اللى على أسطح العمارات بنظارات الرؤية اليلية !!!...و أل إيه التليفزيون المصرى صور الحدث المفاجىء للناس!! ده على أساس إن التليفزيون المصرى اللى كان بيصور صفحة مياة النيل الهادئة أيام الثورة... الكاميرات بتاعته منتشرة و متوغلة و مستمرة ..و يستمر و يستمر و يستمر !! فى كل شوارع مصر المحروسة و بالصدفة البحتة و إذ ربما وقعت عنين المصور على واحد ماشى لوحده يا ولداه وإذ فجأتا يطلع سيادة المشين...يا سيادة المشين ..جديم جديم طحن أخر حاجة ..و مشكلتك إنك زى اللى مرمى على السرير على ضهره مش فاهم إن فى فى مصر جيل مايكولشى معاهم الكلام ده و اللى إنتى عملته مكشوف و مفقوس و حتشوف العيال حيشطفوك إزاى على الفيس ...طبعا المرة اللى جاية بالجلابية البيضة و الطاقية الشبيكة و السبحة فى الأزهر و لا القائد ابراهيم !!!...بصوا بأه يا شعب ..إنتوا المفروض دلوقتى بتعرفوا تتحملوا المسؤلية ..و لو خال عليكم الكلام ده علشان يركب تانى عسكرى و يذلكم و يحطكم تحت جذمته 60 سنة يبقى تستاهلوا اللى حيحصل لكم ..و لعلمكم الأيام اللى جاية سودة بلون النيلة !!..الإنتخابات حتتعمل فى معادها و ستشهد إستقطاب حاد رهيب لم تشهده مصر فى تاريخها و سيقوم رؤوس الحربة فى المعركة الخبيثة – الفراخ البيضا بتعبير أمن الدولة و إنتوا عارفين مين هما – بنشر دعاوى التخوين و التكفير و التفسيق و سيرد الشباب المتحمس و الفريق الليبرالى المدنى بدعاوى التجهيل و العمالة لإيران و السعودية و البلا الأزرق ..و طبعا الفلول حيضيفوا تحابيشهم المتمثلة فى أعمال البلطجة و العنف الذى سيكون بالغ و ممتد فى طول البلاد و عرضها و ستسفك الكثير من الدماء و ينتشر الذعر و الفزع و تهبط البورصة إلى أدنى مستوى و تعلن الدول الكبرى تحذيرات لرعاياها بعدم الذهاب إلى مصر و يقف حال الناس ..حتى يستجدى الجميع مجيىء المخلص ..أبو دبروة و نسر و كاب ..و دمتم ...و كل 60 سنة و إنتم طيبين ..كلمة الختام ..عايزين الثورة تنجح .مش كفاية تقوم على مبارك و نظامه ..لازم تفتح فصل جديد فى التاريخ المصرى و تؤسس للجمهورية الثانية ...لازم نظام 52 يسقط ..لازم البيادات ترجع لسكناتها و معسكراتها و متطلعشى منها و متفكرشى فى يوم من الأيام تطلع ! بس خلاص

نوستالجيا العبيد

نوستالجيا العبيد اللى عند المهابيل دى مش عارف جايه منين ...يا عيل نطع إنتى و هوه ..جدكم أحمس و لا رمسيس الثانى و لا عمر مكرم و لا محمد كريم و لا مصطفى كامل و لا سعد زغلول و لا محمد فريد و لا مصطفى النحاس و لا جمال عبد الناصر ...أشرف و أطهر من أى حاكم تركى عثمانلى خسيس حكم البلد دى !!! ....يبدو أن عرق الذل ضارب فى بدنهم و مش عايز يطلع !!!...يا فلاح خرسيس إنتى و هوه نسيتم الباشا التركى اللى كان بيضربكم و مش بس يكفيه الضرب لازم يسمع من كل ذليل منكم "تشكرات أفنذم " ....ممكن حد بس من الجهلة اللى مش عارفين تاريخ بلد عايزين يحكموها يذكر لى أى إنجاز للحكم التركى العثمانلى فى مصر !!!!!!

للأخوة الأعزاء الذين يبكون على مقتل بن لادن ...هذا الرجل أكثر من أضر بالإسلام و شوه صورة المسلمين فى العشر سنوات الماضية ...هذا الرجل يداه ملطخة بدماء الألاف من المسلمين فى العراق فى الصومال فى المغرب فى الجزائر فى اليمن فى وزيرستان فى أفغانستان ...الحمد لله أن خلصنا من مثل هذا الرجل ... و الأهم من التخلص من أمثاله التخلص من الفكر الذى يقف ورائه

الله أكبر و لله الحمد

http://www.dostor.org/politics/egypt/11/april/14/39993


شكرا شكرا شكرا لرجال المجلس الأعلى للقوات المسلحة ...اليوم أثبتم أنكم مع الشعب و مع الثورة ...اليوم هو اليوم الحقيقى للثورة المصرية ...لم نكن نتوقع من خير أجناد الأرض إلا هذا الموقف ...تاريخ العسكرية المصرية مشرف و الجيش المصرى منذ أن أنشأه محمد على إما قائد لثورة من أجل الحق و العدل أو مساند لها ....اليوم أستطيع أن أرفع رأسى لعنان السماء و أهتف أنا مصرى ...الله... الوطن..... الجيش و الشعب إيد واحدة

القول الفصل فى بلاد الهزل !

أى طالب بيدرس علوم سياسية عارف إن الثورة تعنى هدم النظام السلطوى المستبد ثم المرحلة التى تليها عملية محاسبة و تطهير ثم بداية بناء النظام الديموقراطى عن طريق بناء مؤسساته ودى مرحلة بيبقى فيها الكثير من السيولة و عدم الإستقرار ثم ممارسة الديموقراطية ثم ترسيخ الديموقراطية و المراحل دى تستغرق سنوات و للأسف إحنا بنتخبط و لسا حتى مخلصناش مرحلة الهدم و المحاسبة ...!!!! غير كده يبقى مفيش تحول ديموقراطى ....يبقى تجميل و إعادة إستنساخ لنظام سلطوى

عبد المنعم أبو الفتوح

الدكتور عبد المنعم أبو الفتوح رجل محترم و يفهم جيدا ما معنى الدولة المدنية و رغم أننى من مؤيدى الدكتور البرادعى و لن أعطى صوتى لأحد سواه إلا أن سباق الرئاسة يشرف برجل وطنى حر و عقل متنور و واعى كالدكتور عبد المنعم أبو الفتوح و يا ريت شباب الإخوان بدل ما يقف يهاجمه على الفاضى و المليان يناقش أفكاره.و أنا أقول أن حبى للدكتور عبد المنعم لا يقل عن حبى للدكتور البرادعى ...و السر أن كلاهما صادق و نقى و لا يقول ما يقول و لا يفعل ما يفعل إلا بدافع وطنى