الله يرحمك يا ستيف

سؤال محيرنى من ساعة ما سمعت خبر موت العظيم ستيف جوبز ...هوه أسامة بن لادن حيبقى فى الجنة و ستيف جوبز حيبقى فى النار !!!...طيب أنا بكره بن لادن و بحب ستيف ...حروح فين أنا !!! ...يا دماغى يا مه .. بن لادن كفر و قتل و خرب و نشر الرعب و الدمار !!.. و ستيف كان يعمل 18 ساعة فى اليوم و يبدع و يبهر العالم بمنتجات تدخل عليهم البهجة و السعادة و تسهل من حياتهم و فتحت أفاق المستحيل و الامعقول..الله يرحمك يا ستيف و يعاملك بما أدخلته من سعادة و سهولة و يسر لحياة الناس ...و الله يجحمك يا بن لادن و يعاملك بما أسفرت عنه أفكارك و أعمالك من قتل و تخريب و دمار

داء الجهل أعيا كل داء

فيه بائس من البؤساء سمعته مرة بيهلفط بكلام أقل ما يوصف به هو الجهل ..بأن الحضارة الفرعونية حضارة عفنة و حضارة أصنام و أوثان ....طيب ده يترد عليه بإيه ...حد منكم يفتح أى كتاب فى أى علم من العلوم سواء طب رياضيات هندسة عمارة ..أى شىء يخطر على بالك ..سيجد أن أصل هذا العلم وضعه الفراعنة !!...أعمل إيه أنا مع بائس كهذا من المفترض فيه أن يفتخر بتاريخ و حضارة ..كل الناس فى أى بلد محترم تحترمنا نحن المصريين لأننا أحفاد حضارة خالدة وضعت أساس أى تقدم فى تاريخ الإنسانية و أى متحف فى الدنيا بيعتبر البهو الفرعونى درة التاج فيه و تجد الناس تدخله خاشعة منبهرة من آثار تتحدث عن حضارة بلغت من الرقى و التقدم مبلغا قد يكون أرقى منما نحن فيه الآن و هناك أسرار لم تعرف بعد و أشياء غامضة لم يجد لها الكثيرين تفسير !!...لقد بلغ الفراعنة من التقدم ما تندهش له فى الجبر و الهندسة و علم الفلك و عرفوا يحسبوا محيط الأرض و بنوا الهرم على قياسات مذهلة و توصلوا إلى نسبية أينشتين قبله بخمسة ألاف سنة و مازال العالم يقف مذهولا أمام أسطورة تعامد الشمس مرتين فى العام على وجه الملك يوم ميلاده و يوم جلوسه على العرش ...و لكم أن تقرأوا كتاب الدكتور وسيم السيسى ..مصر التى لا تعرفها ..هناك قصة ظريفة عن سيدنا عمرو بن العاص بعد فتح مصر ..عندما طلب من بعض جنوده إرتقاء الهرم الأكبر و معرفة حجم و قياس قمته ..صعدوا و نزلوا و كان الرد !!!.....مبرك عشر جمال !!!!...نحن أصحاب حضارة و تاريخ يمتد سبعة ألاف سنة و الجينات التى نحملها فيها رقى و شموخ الأجداد و من يحاول أن يختصر تاريخنا لأربعة عشر قرن !!!....مسكين .... لأن المصريين متحضرين و أتقياء منذ عهد أدريس النبى و أخناتون التوحيد و لم تكن صدفة أن يأتيها ابراهيم و يوسف و يتربى فيها موسى و يأتيها المسيح و يضعها محمد فى مكانة محترمه و يتزوج من أهلها..المصريين دخل الإسلام قلوبهم كما يسرى الماء فى النهر ..بسلاسة و هدوء ..لأننا لم نكن بعيديين كثيرا عن قيمه و مبادئه ..و سر الحضارة الإسلامية هى التناغم الذى حدث بينها و بين شعوب و حضارات تقدمها و رقيها و تحضرها سابق أصلا عن الإسلام..و كل العلماء المسلمين تجدهم أبناء حضارات راقية و راسخة كفارس و بين النهرين و الفرعونية .. ما الذى سيستفيده مثل هذا البائس ؟ لا شىء ...الجهل بعيد عنكم !!!بس خلاص

لف و إرجع تانى

أعلم أن المرأة تتميز بالعاطفة و تفكر بقلبها قبل عقلها ..هذه طبيعة و كاركتر لا يمكن تجاهله ..غير أنى أشعر بالإستغراب و الحيرة حين أجد من النساء من تتعاطف مع أراء و أفكار أحزاب و جماعات إسلامية و يتوهمون معهم زمن المن و السلوى الذى يوهمونا به اليوم !!!..بغض النظر نحن مع من أو ضد من ..هناك حقيقة ثابتة و ليس هناك من شك فيها سواء فى الماضى القريب أو فى الحاضر و أرجو أن لا يفتح أحد جدال فى هذا المجال و إلا أسمعته ما يضره - عفوا يسره!!!! -...وصول هؤلاء للسلطة فى أى مكان = مباشرة و دون تردد أو نقاش هبوط المرأة و الأقليات الدينية إلى مرتبة مواطن من الدرجة الثانية على أحسن تقدير !!!...و هم لخلطة غريبة من فهم ناقص للدين و قرائات غير نقدية لتراث بائس كتب فى بيئة غير البيئة و زمن غير الزمن و ناس غير الناس يتخذون هذا الموقف السلبى ضد المرأة على طول الخط ...المرأة ...التى أعتقد يقينا و بناءا على قراءة واعية للسيرة و القرآن.. منحها الإسلام ما لم يمنحها أى دين أو فكر أو منهج سياسى أو فلسفى ...غير أنه قد جرى تشوية كبير من دين الفقهاء على دين الرحمن البين الواضح فى القرآن ..و وصلنا إلى ما وصلنا إليه من أناس يتقربون إلى الله بتجهيل المرأة و بقمعها و تقذيم دورها فى المجتمع و إختصاره إلى ماكينات التفريخ فى قعور البيوت ...فرجاءا من من يدفعها قلبها إلى التأثر بالشعارات البراقة و الكلام الذى يدغدغ العواطف إلى وقفه للتفكير و قراءة التاريخ القريب و الحاضر الكئيب فى الأمثلة الجميلة الرائعة البراقة التى حولنا ..ماء النار الذى يسكب على البنات لمجرد ذهابهن للمدارس فى أفغانستان!!! ..المرأة التى تجلد لمجرد لبسها بنطلون فى السودان أو قيادتها سيارة فى السعودية!!! و المرأة التى تطارد فى حماسستان لأنها تركب موتوسيكل خلف زوجها فى غزة بعد ما إستطاعت الحكومة الميمونة لحماس توفير سيارة لكل مواطن للتنقل فى غزة الخير و الرفاهية ..بس تعمل إيه فى ناس فقرية غاوية مناغشة و قلة أدب و دين !!!!!!!..و المرأة التى تنعم بأرقى مستوى معيشى غذائى صحى فى الصومال!!!...و تذكروا أن قاسم أمين أفنى حياته لمجرد إقناع المجتمع بضرورة خروج المرأة من البيت إلى المدرسة و إلى مجالات عمل ضرورية!!! تذكر و إقرأ كتابيه تحرير المرأة و المرأة الجديدة ... فقط التدريس و التطبيب لغيرهن من النساء !!!!...المجتمعات التى تريد التقدم تمشى للأمام و لا تعود للخلف و أخشى أنه بعد سنوات سنعود لنجاهد جهاد قاسم أمين فى مجتمع بائس يعشق الدوران فى حلقات مفرغه و الحكى فى المحكى زى ما بيقولوا !!!

المشير بيهيس ..عايز يبقى ريس!!

يعنى ايه كوكا زيرو .يعنى مهما اختلف توجهك وتفكيرك مشيرك هو مصيرك

جديم أوى يا بوى

بنتى الصغيرة – عفريتة – و فى منتهى خفة الدم و بمنتهى البساطة ممكن تعلق على أى شىء تعليقات تفطس من الضحك ..كل لما تلاقينى بعمل حاجة و متعجبهاش تقولى – دا إنتى جديم أوى يا بوى – طبعا جيل طلع فتح عينه على الفضائيات و الإنترنت و الموبايل و الفيسبوك بيعتبرنا جيل –جديم- ...فعلا محنا جيل كان بيتفرج على القناة الأولى و الثانية لحد لما التليفزيون الساعة 12 يعمل ووششششششش..و أسعد أوقات حياته لما كان يتفرج على سينما الأطفال مرة فى الإسبوع يوم الجمعة قبل الصلاة و النافذة الوحيدة التى كانت تفتح أمامه على العالم الخارجى إخترنالك يوم الأربعاء و أفلام القناة الثانية الأجنبى المعادة المكررة !!!..و مثل دخول التليفون المنزلى لأغلبنا حدث فارق فى الحياة – لما كنا بنقعد نضرب أى رقم عشوائى علشان نتكعبل فى بنت نعاكسها شوية !!! فعلا جديم أوى ...الأكادة بأه إن فيه ناس أكبر من الجيل الجديم ده بجيلين و فاكره نفسها بتفهم و بتسطنصح على شعب مش يفهمها و هيا طايرة ..لا يفهمها و هيا لسه فى العش !!...يا سيادة المشين ! ..مش حقولك إلا كلمة بنتى –إنتى قديم أوى يا بوى – و هبلة و سخيفة و مكشوفة الحركة العرة اللى إنتى عملتها دى ..و أل إيه لوحدة من غير حراسة !!!..و أحلف على الميه تجمد إن نص اللى فى الشارع كانوا قوات خاصة و مخابرات – طبعا فى لباس مدنى – ده غيرالقناصة اللى على أسطح العمارات بنظارات الرؤية اليلية !!!...و أل إيه التليفزيون المصرى صور الحدث المفاجىء للناس!! ده على أساس إن التليفزيون المصرى اللى كان بيصور صفحة مياة النيل الهادئة أيام الثورة... الكاميرات بتاعته منتشرة و متوغلة و مستمرة ..و يستمر و يستمر و يستمر !! فى كل شوارع مصر المحروسة و بالصدفة البحتة و إذ ربما وقعت عنين المصور على واحد ماشى لوحده يا ولداه وإذ فجأتا يطلع سيادة المشين...يا سيادة المشين ..جديم جديم طحن أخر حاجة ..و مشكلتك إنك زى اللى مرمى على السرير على ضهره مش فاهم إن فى فى مصر جيل مايكولشى معاهم الكلام ده و اللى إنتى عملته مكشوف و مفقوس و حتشوف العيال حيشطفوك إزاى على الفيس ...طبعا المرة اللى جاية بالجلابية البيضة و الطاقية الشبيكة و السبحة فى الأزهر و لا القائد ابراهيم !!!...بصوا بأه يا شعب ..إنتوا المفروض دلوقتى بتعرفوا تتحملوا المسؤلية ..و لو خال عليكم الكلام ده علشان يركب تانى عسكرى و يذلكم و يحطكم تحت جذمته 60 سنة يبقى تستاهلوا اللى حيحصل لكم ..و لعلمكم الأيام اللى جاية سودة بلون النيلة !!..الإنتخابات حتتعمل فى معادها و ستشهد إستقطاب حاد رهيب لم تشهده مصر فى تاريخها و سيقوم رؤوس الحربة فى المعركة الخبيثة – الفراخ البيضا بتعبير أمن الدولة و إنتوا عارفين مين هما – بنشر دعاوى التخوين و التكفير و التفسيق و سيرد الشباب المتحمس و الفريق الليبرالى المدنى بدعاوى التجهيل و العمالة لإيران و السعودية و البلا الأزرق ..و طبعا الفلول حيضيفوا تحابيشهم المتمثلة فى أعمال البلطجة و العنف الذى سيكون بالغ و ممتد فى طول البلاد و عرضها و ستسفك الكثير من الدماء و ينتشر الذعر و الفزع و تهبط البورصة إلى أدنى مستوى و تعلن الدول الكبرى تحذيرات لرعاياها بعدم الذهاب إلى مصر و يقف حال الناس ..حتى يستجدى الجميع مجيىء المخلص ..أبو دبروة و نسر و كاب ..و دمتم ...و كل 60 سنة و إنتم طيبين ..كلمة الختام ..عايزين الثورة تنجح .مش كفاية تقوم على مبارك و نظامه ..لازم تفتح فصل جديد فى التاريخ المصرى و تؤسس للجمهورية الثانية ...لازم نظام 52 يسقط ..لازم البيادات ترجع لسكناتها و معسكراتها و متطلعشى منها و متفكرشى فى يوم من الأيام تطلع ! بس خلاص

نوستالجيا العبيد

نوستالجيا العبيد اللى عند المهابيل دى مش عارف جايه منين ...يا عيل نطع إنتى و هوه ..جدكم أحمس و لا رمسيس الثانى و لا عمر مكرم و لا محمد كريم و لا مصطفى كامل و لا سعد زغلول و لا محمد فريد و لا مصطفى النحاس و لا جمال عبد الناصر ...أشرف و أطهر من أى حاكم تركى عثمانلى خسيس حكم البلد دى !!! ....يبدو أن عرق الذل ضارب فى بدنهم و مش عايز يطلع !!!...يا فلاح خرسيس إنتى و هوه نسيتم الباشا التركى اللى كان بيضربكم و مش بس يكفيه الضرب لازم يسمع من كل ذليل منكم "تشكرات أفنذم " ....ممكن حد بس من الجهلة اللى مش عارفين تاريخ بلد عايزين يحكموها يذكر لى أى إنجاز للحكم التركى العثمانلى فى مصر !!!!!!

للأخوة الأعزاء الذين يبكون على مقتل بن لادن ...هذا الرجل أكثر من أضر بالإسلام و شوه صورة المسلمين فى العشر سنوات الماضية ...هذا الرجل يداه ملطخة بدماء الألاف من المسلمين فى العراق فى الصومال فى المغرب فى الجزائر فى اليمن فى وزيرستان فى أفغانستان ...الحمد لله أن خلصنا من مثل هذا الرجل ... و الأهم من التخلص من أمثاله التخلص من الفكر الذى يقف ورائه